Hebrews 7

Malkizedek Dnagmayi

1Malkizedek ɓei gyibe dna Salima nu. Wo ɓei zhin Shekwoyi pirist nu, njesun wa shegun Ibrahim woi zhi kun-sun, n asuyi, wa tu Ibrahim anabarka. 2Ibrahim wa ga Malkizedek zakka. Malkizedek awyega ge, “Ɓemanayi zhin yi.” Wo ɓei gyibe dna n Salima nu Salima awyega ge bugbafu nu. (Wato Esu bugbafu nya).

3Malkizedek to ɓei n eya yi m. Eda ton, oɓi ma to nyin a takpe esa ye n na ɓei ma wo m, ko esa nwo ɓei fi m. Wo ɓei zhin ngye Shekwoyi nugun dogbe nu. Wo zhin pirist nu nyalo-nyalo.

4Wo to ɓei zhin oza dnagmayi nu m? Ibrahim, Shekwoyi za kni-kniyi ɓei ga wo nu zakka. 5A Levi hi ɓei zhin Shekwoyi a pirist nu. Ɓa ɓei zhin Levi a yawyi nu. Shekwoyi ɓei gna ɓaɓe ɓa gwo Sadaka n naza. Ɓa ɓei gwo n ɓa zaje nu kwa bma ɓa zhin. Shekwoyi nu ɓei gna ɓa ge ɓa zhin lonu. 6Amma Malkizedek, to ɓei zhin Ibrahim za nu n Amma wo ɓei la sadaka gwo n Ibrahim. Wohin kwa wa tu Ibrahim anabarka. Ibrahim ɓei zhin ozanu n Shekwoyi anabarkai tu. 7Yi kpe lo ge zadnagmayi nu zhin watu zanawyi anabarka.

8A Israilayi pirist ɓa to ku fin, amma Malkizedek ɓei wu gbo, Wo nyi har nyalo-nyalo.

9Levi, wonu ɓei zhin pirist dnagmayi dada, Wohin kwa wa ga Malkizedek sadaka dna n Ibrahim. 10Ko a to ɓei ma Levi nyin, owo bye ɓei dna n Ibrahim mi sanu Ibrahim ɓei ga Malkizedek Zakka nyi.

11Levi puwa ɓei zhin a pirist puwa nu, Kni nu ɓei zhin Yesu wa je pirist zhin a? Malkizedek wa ze degbeyi ama to Haruwa nu ma? Ai a pirist vinya ɓei kun n Levi puwa nu.

12Da shike a pirist tnu-tnu ɓei la shando dole a shan wyidna do, Shekwoyi nu ɓei shando ce n wohin. 13Yesu eyi pirist wo to ɓei gmi n Levi puwa nun. 14Yesu ɓei gmi n Yahuda bye nu. A Yahuda yi to ɓei zhin a pirist nu m. Ntu ge Musa to ɓei kni ɓa nun. 15Deye kwa wu yi ge Shekwoyi zokwo ɓei la shan do da shike pirist zokwo ɓei la shan do da shike pirist zokwo ɓei la shando. Ko laze ngye Malkizedek nya nu. 16Yesu to ɓei zhin pirist nayi nya num. Amma wo ɓei ze pirist n iko yi n ko ta shan zo m. 17Shekwoyi wa da n Zabura 110 ge, “Ho zhin mi pirist nu nyalo-nyalo, Ho zhin n gye Malkizedek nu.”

18Deye kwa wu ge aɓei la pirist zokwo kwo-kwoyi zunya. Ko to ɓei n kalayi dei-dei m, Kwo to ɓei mi kwa gni za m. 19Kwo to ɓei ga za n befyece m, Kwo to ɓei mi kwo lo n zai n Shekwoyi aba m. Amma Yesu ɓei la ɓe nu wyetu yi, Owonu na ɓe n yi vi-viyi n Shekwoyi aba.

20Shekwoyi ɓei la nyasi si nge Yesu zhin pirist nyalo-nyalo nya nu. 21Shekwoyi to ɓei zhin lonu n pirist a je yi m. Amma n Yesu tukwo, wo ɓei si nya si wa gna ge, “Ho zhin pirist nu nyalo-nyalo nya.” 22Ntu deye ɓo Kristi ta gba kalam, ntuge Shekwoyi la nyasi si, Kristi ɓa gyi abye har nyalo-nyalo.

23N sapai, a pirist ɓei mwa begye, n nabai n zaho wa fi, sai a dna do.

24Amma Yesu ta shan fi m, ata mi a shan wo do m, ntu cenu ata ye zado lo m. 25Gni-gni nwo ga nyi, kwo nu-nuyi lo njesun kwo zhin nyalo-nyalo nya nu. Yesu nyi nyalonyalo. Ntu cenu Yesu ɓa mi wa gni aza nɓa ɓe wa ba nyi. Wo zhin wa gyi Shekwoyi wye ntu yi ɓo. 26Wo ɓei la ze ngye ʼyi kodashike wo to ɓei zhin laifi m, Oza gyi-gyi-yi nu, n tna zamba. A woi knaya n na alaifi da, a mwa-mwa gawo n eshemi. 27Yesu to wu ngye a pirist a je nun, Wo to ɓei zhin sadaka ntu wa alaifi ɓom; amma ntu na za ɓo nu. Wo ɓei bwa fi zun gmanyi nu ntu ya laifi ɓo. 28Wyidna wato Musa owa, kwo nu ɓei kni a gbaizanyikwoci dna a pirist tnu-tnu. Ɓa ɓei zhin a laifi da nu. Amma wyidna woi-woyi nu na kni Yesu, Shekwoyi nugun. Wo to ɓei zhin laifi da Shekwoyi nu na kni wo pirist nunuyi nyalo-nyalo.